пост

(франц. poste, лат. positus — қойылған)

1) сақшыға күзету және қорғау үшін тапсырылғандардың барлығы, сондай-ақ ол өз міндеттерін орындайтын орын немесе жергілікті жер аумағы. Қазақстан Республикасы Қарулы Күштерінде посты ұйымдастыру және жабдықтау талаптары, сондай-ақ онда қызметін атқару тәртібі ҚР Қарулы Күштерінің гарнизондық және қарауыл қызметі Жарғысының ережелеріне сәйкес анықталады. Орналасуларына қарай посттар ішкі және сыртқы, ал сақшылардың ауысым санына қарай — 1, 2 және 3 ауысымдық болуы мүмкін. Кейбір жағдайларда әскери бөлімнің аумағынан тыс орналасқан, пост құрамына кіретін объектілер айналасында қажет болған жағдайда бөгде тұлғалар үшін тыйым салынған аймақтар белгіленуі мүмкін. Мұндай аймақтардың шекаралары жергілікті жердегі өкімет органдарымен келісіледі және "Тыйым салынған аймақ, өтуге (жүруге) рұқсат жоқ (жабық)" деген жазуы бар, анық көрінетін белгі қойылады;

2) арнайы міндетті орындаушы әскери қызметші немесе топ (шағын бөлімше) міндетті орындауға арналған, тиісті әскери техникамен жабдықталған орын (пункт). Мыс., әуе шабуылына қарсы қорғаныс посттары, бақылау посттары, коменданттық посттар, іс-қимылды реттеу посттары және т.б. бар;

3) техникалық құралдар мен құрал-жабдықтар орнатылған және олардың көмегімен кеме наряды қызметін атқарушылар өз міндеттерін орындайтын кемедегі орын (палуба телімі, бөлме). Бұл нарядтардың түрлері мен арналуларына қарай посттар кемелік кезекшілік, кемелік вахта және арнайы вахта посттары болып бөлінеді.